අප
දුම්රිය පොළෙන් පිටවන
පියගැට පෙළ බසින විට
එතෙක් එක් වී පැමිණි
අන් අය රැගෙන
වේදිකාව ද පසුකොට
ඇදී යන්නීය දුම්රිය
හෙමිහිට
අප වෙතින් ඈතට..................


11/12/2010

නොකඩවා
ඇද හැලෙන වැස්සට
මුහුණ දීගෙන උන්නු හින්දම
කිළිටි දූවිලි පොදක්වත් නැති
පිච්ච වැල......
කිරි සුදෙන් බැබලෙන...!


04/12/2010

වැටත් නියරත්
තරඟෙට..

අපරාදෙ නිල්වන් ගොයම
වැඩීගෙන ආ
සරුවට...!


20/11/2010

ඔබ වම'ත
වෙදැඟිල්ලෙ ලූ මුදුවෙන්
පරාවර්තිත
හිරු කිරණ කදම්බය
දවා අළු කළා
මගෙ හිත...!


20/11/2010

තුරු හිසක
අතු පතර රැඳවුණ
සරුංගලයක්

ඈත අහසට
යොමාගත් නෙත
පාළු බැල්මක්

05/10/2010

පිපී සුළඟේ නටන
උක් මලක්...
අසල ඇති
දිය තලය මත පෙනෙන
ඇගේ රුව
කිමිද යන කෙකින්නක්
විලස ගෙන
ඈ දියෙන් මතුව එන
මොහොත දැන් දැන් වෙතැයි
උණුසුම් ව
නොසෙල් වී
ඒ දෙස ම
බලා හිඳිනා කොකෙක්...

02/10/2010

බොර දියේ පිපුණු
ඕලු මල් අසල
දැහැන් ගත වූ කොකා
දකින්නට නැතිව ඇති
ඕලු කොළ යට නටන
තිත්ත පැටවුන් රෑන..?

21/09/2010

එකම වට
නැවත නැවතත් සපුරන
ගොනු දැක
අන් කුමක් කරන්නද
ක්ලාන්තව
ඇද වැටෙනු හැර
සෙක්කු ගල..!

ප්‍රස්තුතය: උදේ සවස යන එන විට දකින
ඇද වැටුණු සෙක්කු ගලක්.

08/09/2010

ගොඩ බිමට පාර කී
පහන් ටැඹ
විහිදි එළියට වඩා
සරැළි දිය මත දිලී
දියඹ වෙත මග කීව
සඳ පහන
රසඳුනක් වූ අරුම..!

නිමිත්ත: පසුගිය ඇසළ පෝදා සැන්දෑවේ පොල්හේන වෙරළේ දී දුටු සොඳුරු දසුන

කොඳ කුමුදු පිපෙන්නේ
සඳ කිරණ වැදී මිස
කණමැදිරි එළියටැයි
කවුරුවත් කීවාද...?

පෙර'ඹරින් හිරු නැගී
අලු විහිදි කල විනා
මැටි පහන් එළියකට
නෙළුම් මල් පිපුණා ද..?

13/08/2010

නළල දිග
සින්දූර ගලා ගිය
කළුම කළු දැළි සුසුම්
අහස් කුස ඉඹ ගත්ත.....,
පාළු මූසල රෑක
වෙඩි වැදී
තනි තරුව බිම වැටුණ....,
කඳුළු මතකය අරන්
හෙමි හෙමින් නැගෙනවා
ඇසළ සඳ...!

09/07/2010

හිරු දැක පිපුණ
මහනෙල් කැකුළ අබියස
ඉරිසියාවෙන් රතුව
බත් කූරෙක්....
මහනෙල් කැකුළ
ඒ ගැන තුටින්...
මඳ සිනා පාමින්...

07/07/2010

දියවෙලා තියෙන ලුණු
නොසළකා හැරිය විට
සප්ත මහ සාගරේ
පිරෙන්නම ඇත
වතුර..!

30/06/2010

හිම ගිර ද
ග්ලැසියර ද
කවදාක හරි
සැඩ හිරුරැස් වැදී
දියවී යන්න නියමිත....

කවදාක හරි...!

23/06/2010

මහනෙල් කොළයක් මත
රතු පාට බත් කූරෙක්
මහත් ඉවසිල්ලකින්.......
තවම දිය යට හිඳින
පුංචි මහනෙල් කැකුළ
පොකුණ මතු පිටට විත්
පෙති විදා පිපෙන තෙක්..!

09/06/2010

කැදැල්ලේ උණුහුම
හොඳින් හඳුනන නිසා
සිතූ දුර පියාඹන
සියොතුන්....

21/05/2010

අහස....
කරුණාවන්ත.
කළු කරගෙන මූණ...
හංගගෙන කඳුළු....
එව්වෙ කහමල් විතරමයි..
ගහ අත...
මම ඒ යටින් යනකොට..!

13/05/2010

ගින්නට හසුව
මිය ගියේ යැයි සිතුව
ගස් කඳක
රතු පාට
නැවුම් දල්ලක්..!

12/05/2010

මඳ පවන...
පාවී ආ වරා මලක්
වක්කළමක
දිය සුළියක....

05/05/2010

ඊයෙ තිබුණු
මන්දාරමේ හැටියට
කොහොමවත් හිතුණෙ නෑ
දකින්නට හැකියැ‍යි
අද
මේ තරම් පැහැදිලිව...

29/04/2010

නිල් පාට අහසක පාවෙන
සුදු පාට වළාකුළු එක්ක
අපූරුවට ගැළපෙන
කහපාට ගම්මාළු මල්...

27/04/2010

'අයාලේ ගිය සිතක සටහන්'
කියවන
මගෙ අයාලේ ගිය හිතට
හොරකු යැයි රැවටුණ
කිරළෙක්
අන්න හඬාගෙන අහසට....!

22/04/2010

නිල් ම නිල් අහස යට
කොළපාට තුරු වියන
මැදින් අහසට නැගුණ
කණකොකා ගේ සුද...!!!!!!!!

20/04/2010

මද්දහනේ
ගිනිගත්ත ඉර යට
කකියන මහමග මැද
ඈතින් පෙණුන ජලකඳ
ළඟට ගොස් බැලු සඳ
ගෙන ගොස් තිබුණි කවුරුද....!

20/04/2010

පර වී ඇද හැලෙන
ඇහැළ මල් පෙති සමඟ
තරඟෙට
ඉදුණු මැයි මාර කොළ...!

20/04/2010

එළිය දෙසට පිටුපාගෙන

අඳුර දෙසට නුඹ යන සඳ..

නුඹට ඉදිරියෙන් හිඳගෙන

නුඹේ තනිය දුරු කළ මුත්....

එළිය වෙතට යන ගමනේ

නුඹ පසුපස එන මා ගැන

නොතැකුවාට

තරහක් නැත...

10/04/2010

ඊයෙ තද දම් පාට
නමුදු
අද සුදු පාට
තන්බ'ජියා මලක්......
ඒ අසල,
හිත රිදී
තරහවෙන් රතුව ගිය...
වෙනතකට නෙත් යොමාගෙන හිඳින කටුස්සෙක්....
නොමැති බව මල අතෙහි
කිසි වරද
ඌට කියනුයෙ කවුද..?

07/04/2010

කලලේ උපන
කලලේ වැඩෙන
කලලේ මියෙන
එසේ වුව...
කිසිම දින
කලලේ නොගෑවී
නිකසලව සිනාසෙන
උස් ව පිපි
නෙළුම් මල...!

07/04/2010

ගණ අඳුරු රාත්‍රියේ
හාත්පස එකලු කළ
විදුලි අකුණ නොවන්නට
කොහොම දැක ගන්නද
රහසෙම පිපුණ
සොඳුරු කඩුපුල් මල......

06/04/2010

04/04/2010

මහමඟ විසුල
සොඳුරු මල් පාවඩය
නොපාගා යන සඳ...
කොයි තරම් අපූරු ද....
හිස මතට
ඇද හැලුණු....
පුංචි කහ මල් වැස්ස....!

01/04/2010

යාන්තම්
කළුවර වැටෙන කොට
වත්ත පාමුළ
දූරියන් ගස
වසාගෙන කෑ ගහපු
වවුලන්
එකෙක්වත් නැත
සඳත් සැඟවුණු
රැයේ පාළුව බිඳ දමන්නට....
පෙති හැළුණු මල්
නිදයි වැතිරී
අඳුර කැටි වුණු
ගස් සෙවන යට.....

30/03/2010

රිදී පාටට
ගහ කොළ තෙමන
සඳ එළිය විතරමයි
බලන්නට උන්නෙ මම
ඒත්..
නුඹ..අද..
හැංගිලා ඇයි
වළාකුළකට...?

30/03/2010

මෙතෙක් වූ ඉඩෝරෙට
නොමළ මහනෙල් පඳුර.....
අද
සිහිල් දිය පිරි
පොකුණ මැද හිඳ
රුවැති මලකුත් හිස පැළඳගෙන..
මල මත වැසූ
රතු පාට බත් කූරා ද සමඟම....

30/03/2010

පිපුණු කජු මල්වල..
ඉදුණු පුහුලම් වල
සුවඳ...
අරගෙන ඇවිත්
කොවුලාගෙ පණිවිඩයම.....!

30/03/2010

බිඳෙන් බිඳ මං දුන්නු.....
හෙමි හෙමින් එකතු වුණු......
කාටවත් නොපෙන්නා
තනියෙන් ම දරාගෙන
විඳවාපු.....
කැටි ගැහුණු වේදනා
එව්වාද මා වෙතට එක් වර ම…..
ටික දොහක් තියාගෙන
ආයෙමත් එවන්නට
නුඹ වෙත ම….?

28/03/2010

මෙතෙක් කල්
නුඹෙන් ලද
සියල්ල ම ඔන්න ආපසු...!
දැන් ඉතිං
අපට පුළුවන්
පටන් ගන්නට
අපේ කතාව
මුල ඉඳන්...

28/03/2010

වෙනදාට
තනි තනිව
සීරු මාරුවට ඇවිද යන
කොක්කු
ඔක්කෝම අද
එක ලියැද්දක.
කන්න රැස්වීමක....?

27/03/2010

තාරකා ඉබ්බාගෙ
ඉතා හැඩ පිට කටුව
හැමෝටම පෙන්නගෙන.....
ලෝකෙන් ම සඟවගෙන
ඌ..උගේ
ගැහෙන හිත....!

26/03/2010

මුවෙහි විට තෙක්
පිරුණු කළයක
තවත් කෝ ඉඩ
දමන්නට දිය......

කොළත් නොපෙනෙන
ලෙසින් පොකුණක
නෙළුම් පිපි කල
ඕලු මොකටද...?

26/03/2010

ගසින් ගිලිහී යන්ට
නියමිත ව කල් බලන
ඉදී ගිය කොළයකට......
ඇල්ලක් ව ඇද හැලෙනු
පිණිස
චණ්ඩව ගලන
දිය පහර මැද හිඳින
පුංචි පෙණ බුබුලකට......
හිතෙන්නේ මොනවාද
කාටවත් හිතුණා ද...?

25/03/2010

රෑ පිපී සුවඳ දෙමි
සිත තැවුල් නසාලමි
හෙට උදේ ඔබ පයට
සුසුදු පාවඩය වෙමි..

22/03/2010

නෙලා අතට ගත් විට
පෙති කැඩී ඉහිරෙන
ඇට්ටේරියා මල.....
විඳ ගනිමි
නුඹ සුවඳ පමණක්
සිත පුරා මම.

21/03/2010

පිපී
අත ළඟ වැනී ගිය
මල් කැකුළ
ඉඩ තිබිණි
තව සොඳුරු වන්නට
පිපුණි නම්
අත පොවන්නට බැරි
කටු පඳුරක
ඉහළ අත්තක....

21/03/2010

පුර පෝය දවසට
පායන හඳට වැඩියෙන්
ලස්සනයි
පේන නොපෙනෙන ගණනට
යාන්තම් පායපු හඳ...

21/03/2010

ඊයේ
හාත්පස වසා
ඇද හැලුණු
අඳුරු පැහැ
වැසි තිරය
අද
දෙවැට වසා
ඇද හැලෙන
දම් පැහැති
තන්බර්ජියා
මල් තිරය

17/03/2010

අන්දර ගහේ
මුල් අතරේ
එක ම තරමේ
නුග පැළේකුත්
බෝ පැළේකුත්
තරඟෙට....!

17/03/2010

බිම පතිත වූව ද
කිසිදු වෙනසක් නැතිවම
සිත බැතින් පුරවන
අරලියා මලේ සුවඳ
කොයිතරම්
අපූරුද..?

16/03/2010

එළා ලූ සුරත
ඇඟිලි අතරින්
ගලා හැලෙන දිය මෙනි
නුඹ...
බලා හිඳිනු හැර
වේ ද අන් පිළියම
මෙ දියත..?

14/03/2010

පිච්ච වැල
ඊයෙ බලන විට
ගත පුරා ම
දළු පැළඳගෙන..
කොහොමද දන්නෙ නෑ
දැන ගත්තෙ
රෑ වහින බව..?

14/03/2010

හැමදාම නැතත්
එනව නම්
ඉඳහිටවත් මෙහෙම
නුඹ
වැස්ස...!

14/03/2010

පියවෙන දෙනෙත්....
වැසි..
මල් මත පිනි..
බබළන ළ'පළු...
දිලෙන තණපත්...
ගලන දොළ..
එක්වර ම...දුම්රියේ නළා හඬ....
නැවතත්...
ඇස් කෙවෙන දුහුවිල්ල....!!!!

12/03/2010

කඩියන් සහ දිමියන්
කෙළි පිණිස වන්
පොර පිටියක් වට
ආරක්ෂාවට
කළු කූඹි.....!!!

12/03/2010

එගොඩ වුණ පසු
දොළ පහරකින්
අහලවත් තියෙනවද
කරේ ගෙනියන බවක්
උදව් වුණු
ඒ දණ්ඩ...?????

උයාගත් පසු
රහට කිරිහොදි
විසිනොකර මොනවටද
හොද්ද රස කරන්නට
දැමූ
කරපිංච කොළ...?????

12/03/2010

පොඩි කාලෙ
ආදරෙන්
හදපු
කඩදාසි ඔරු
වැහි වතුරෙ පාවෙලා
යනු බලා
තුටු වීමු....
ඉතිං
ඇයි....
අද මොකද...??

නුඹේ ගෙවත්තේ
තාප්පය අයිනේ
වැඩුණු මහ ගසෙහි
අයිතිය නුඹට ය...
ඒත්
එහි සෙවණ
මට ය...

රැගෙන අහුමුල්ලකින් එළියට
පිසැ'ර දූවිලි
මකුළු දැල් නෙක
ලෙහී ගිය තැන් මැසුවෙ කදිමට
අනින්නට බව
වටේටම කටු
හිතාගන්නට
නොහැකි වුණි
මට...!

09/03/2010

කැටක් වැටුණම
නිසල පොකුණට
දිය තරඟ නංවා
බොහෝ කොට
සෙමින් කිමිදී
ගොසින්
පතුළට
නතර වෙනු ඇත
සදා කාලෙට....

08/03/2010

සරුංගලේ,
නුඹ
ඈත ආකහේ
පාවෙන්නෙ නිදහසේ
නූල මා අතේ බව
දන්න හින්දා නේද?

08/03/2010

මුව විට තෙක් ම
පිරී ඇති විටෙක
තවත් ලදහොත් දිය
වාන් නොදමා ද
වැව...

පොළෝ ගැබ තුළ
පැසවනා ලෝ දිය
බුර බුරා නැගුණහොත්
තව
පුපුරා නොයා ද
යමහල...

06/03/2010

නිමා නොමැතිව
සුමුදු සඳ කැන්
එළිය ලබනට
සිහිල විඳිනට
මේ රාත්‍රිය

එළි නොවේ නම්....

රැය පුරා
නෙතු අතර රඳනා
මිහිරි සිහිනය
බොඳ නොවීමට
මේ රාත්‍රිය
එළි නොවේ නම්.....

දහවලේ
සැඩ හිරු කිරණ වැද
තැලී මැළැවී යාවි
සිත් මල
නපුරු හෙටකට
එනු නොහැකි ලෙස
මේ රාත්‍රිය
එළි නොවේ නම්.....

06/03/2010