බබලන නිල් අහස
සිසාරා
පියාඹන විට
හිතෙන්නේවත් නැතිව ඇති
කළුකරගෙන වහින බව
තව ටිකකින්...

01/03/2011

කියවමි නැවත
ආසාවෙන් කියවූ කුඩා කල..
'නපුරු පාලකයෝ තුන්දෙනා'

මෙවර කතාවේ
නටන පාද ලා බොහෝ ය..
භූගෝල ගුරුවරුද අසරණව..
නහය උඩ
කුරුලෑව පමණක් ඇතිව..
ඔටුන්න හිමි ටුට්ටි
තවම බොළඳය..
කවදාවත්
වැඩිහිටි නොවන පාට ය..

මහළු අව්ගුස්ටෝ
කොහිද?
සර්කස්කාර ටිබුල්
අතුරුදන් වී වත් ද?
සුන්දර සුවනී
නොමැත ඉපදී තවම.

අහසේ තරු අල්ලන්නට
වැලි මිරිකා වතුර ගන්ට
පුළුවන් අර්නේරිලා
නැත
යන්නට ගොසිනි රට හැර.

ප්‍රොස්පේරෝ
එන්න
බලා ඉන්නෙමු අපි
එනතුරා ඔබ
නිල් ඇස් සහිත
සෙබළා ද කැටිව.

23/02/2011

ගිලිහී යන මල් පෙත්තක..
විසිරී යන වළා රොදක....
මිහිරියාව
සිතට දැනුන
ලියා තබමි හිස් අහසක

වියැකී යන පිනි බිඳුවක...
පාවී යන වරා මලක...
සුන්දර බව
සිතේ ඇඳුන
ලියා තබමි හිස් අහසක

බැස යන හිරු රැස් දහරක..
ලිහී වැටෙන තරු කැටයක..
අසිරිසිරිය
සිතේ මැවුණ
ලියා තබමි හිස් අහසක

වෙන්වී යන සෝ සුසුමක..
ගලා හැලෙන උණු කඳුළක..
ළෙංගතුකම
සිතේ රැඳුණ
ලියා තබමි හිස් අහසක....!

22/02/2011

එක දිගට
ඇද හැලුණු
මහ වැස්ස යට පිපුණු
කහ පාට මල් වියන...
මිලානව ඇද හැලී
තැනූ පාවඩ පලස...
නොපාගා
සීරුවට පිය නගා ඔබ යන්න...
අන්තිමට ඉතිරි වුණ
තවත් මල් දෙක තුනක්..
හෙට විතර වැටෙන්නට..
මග බලන්...
දුක් බරව...!

14/02/2011

ඇවිත් යන
දිය රළට තෙමෙමින
වෙරළෙහි ගල්පරය මත
ඇලී ගත් වනම
නොසැලී හිඳින මට්ටි......

18/01/2011

මග යනෙන
අන් අයද
තෙතබරිත කරවන.....
මාවතේ එකතු වුණ
දිය කඩක බැසගත්ත
කපුටු රංචුවක
ස්නාන ප්‍රීතිය..!

12/01/2011

අප
දුම්රිය පොළෙන් පිටවන
පියගැට පෙළ බසින විට
එතෙක් එක් වී පැමිණි
අන් අය රැගෙන
වේදිකාව ද පසුකොට
ඇදී යන්නීය දුම්රිය
හෙමිහිට
අප වෙතින් ඈතට..................


11/12/2010

නොකඩවා
ඇද හැලෙන වැස්සට
මුහුණ දීගෙන උන්නු හින්දම
කිළිටි දූවිලි පොදක්වත් නැති
පිච්ච වැල......
කිරි සුදෙන් බැබලෙන...!


04/12/2010

වැටත් නියරත්
තරඟෙට..

අපරාදෙ නිල්වන් ගොයම
වැඩීගෙන ආ
සරුවට...!


20/11/2010

ඔබ වම'ත
වෙදැඟිල්ලෙ ලූ මුදුවෙන්
පරාවර්තිත
හිරු කිරණ කදම්බය
දවා අළු කළා
මගෙ හිත...!


20/11/2010

තුරු හිසක
අතු පතර රැඳවුණ
සරුංගලයක්

ඈත අහසට
යොමාගත් නෙත
පාළු බැල්මක්

05/10/2010

පිපී සුළඟේ නටන
උක් මලක්...
අසල ඇති
දිය තලය මත පෙනෙන
ඇගේ රුව
කිමිද යන කෙකින්නක්
විලස ගෙන
ඈ දියෙන් මතුව එන
මොහොත දැන් දැන් වෙතැයි
උණුසුම් ව
නොසෙල් වී
ඒ දෙස ම
බලා හිඳිනා කොකෙක්...

02/10/2010

බොර දියේ පිපුණු
ඕලු මල් අසල
දැහැන් ගත වූ කොකා
දකින්නට නැතිව ඇති
ඕලු කොළ යට නටන
තිත්ත පැටවුන් රෑන..?

21/09/2010

එකම වට
නැවත නැවතත් සපුරන
ගොනු දැක
අන් කුමක් කරන්නද
ක්ලාන්තව
ඇද වැටෙනු හැර
සෙක්කු ගල..!

ප්‍රස්තුතය: උදේ සවස යන එන විට දකින
ඇද වැටුණු සෙක්කු ගලක්.

08/09/2010

ගොඩ බිමට පාර කී
පහන් ටැඹ
විහිදි එළියට වඩා
සරැළි දිය මත දිලී
දියඹ වෙත මග කීව
සඳ පහන
රසඳුනක් වූ අරුම..!

නිමිත්ත: පසුගිය ඇසළ පෝදා සැන්දෑවේ පොල්හේන වෙරළේ දී දුටු සොඳුරු දසුන

කොඳ කුමුදු පිපෙන්නේ
සඳ කිරණ වැදී මිස
කණමැදිරි එළියටැයි
කවුරුවත් කීවාද...?

පෙර'ඹරින් හිරු නැගී
අලු විහිදි කල විනා
මැටි පහන් එළියකට
නෙළුම් මල් පිපුණා ද..?

13/08/2010

නළල දිග
සින්දූර ගලා ගිය
කළුම කළු දැළි සුසුම්
අහස් කුස ඉඹ ගත්ත.....,
පාළු මූසල රෑක
වෙඩි වැදී
තනි තරුව බිම වැටුණ....,
කඳුළු මතකය අරන්
හෙමි හෙමින් නැගෙනවා
ඇසළ සඳ...!

09/07/2010

හිරු දැක පිපුණ
මහනෙල් කැකුළ අබියස
ඉරිසියාවෙන් රතුව
බත් කූරෙක්....
මහනෙල් කැකුළ
ඒ ගැන තුටින්...
මඳ සිනා පාමින්...

07/07/2010

දියවෙලා තියෙන ලුණු
නොසළකා හැරිය විට
සප්ත මහ සාගරේ
පිරෙන්නම ඇත
වතුර..!

30/06/2010

හිම ගිර ද
ග්ලැසියර ද
කවදාක හරි
සැඩ හිරුරැස් වැදී
දියවී යන්න නියමිත....

කවදාක හරි...!

23/06/2010